Zapatero anunció dellos proyectos p'Asturies na so visita

Como s'esperaba, el presidente español José Luís
Rodríguez Zapatero aprovechó la so visita a Asturies pa dar
anuncia de proyectos y inversiones n'Asturies. La definición de
l'aportación pal nuevu hospital, la regasificadora y l'autovía
Asturies-Ponferrada son les anuncies que más rescamplen.



La visita del presidente español recorrió los principales
obres públiques que tán nestos momentos en procesu n'Asturies,
quitando l'autovía del cantábricu y la variante de Payares. Zapatero visitó les
obres del nuevu Hospital, asina como les d'ampliación de Musel, y
nesi marcu aprovechó p'anunciar dellos compromisos del Estáu con
proyectos n'Asturies. Yá a primer hora, nel conceyu de trabayu que
tuvieron el presidente del Principáu Vicente Álvarez Areces y
Rodríguez Zapatero aprovecharon pa firmar un documentu que supón
el compromisu del Estáu no que cinca a ayuda financiera pa la
construcción del nuevu hospital central d'Asturies. Esti compromisu
materializase en 72 millones d'euros que representen un terciu del coste
total de la obra, presupuestada nestos momentos en 205 millones d'euros.



Otra manera, Zapatero tamién anunció que nel
próximu plan enerxéticu nacional, que tien que tar
diseñáu pa últimos de 2005, va tar incluyida la
regasificadora d'El Musel, revindicación que vien de vieyo, y que'l
Principáu nun fue quién a algamar na domina de gobiernu del
Partíu Popular. El presidente español tamién
anunció que'l so gobiernu va collaborar col asturianu na
construcción d'una autovía ente La Espina y Ponferrada, anque nun
s'atrevió a dar más datos sobre en que diba consistir esa
collaboración nin con que plazos se trabayaba.



Tamién bastante imprecisu tuvo Zapatero a la hora de falar del
plan de la minería del carbón y del desaniciu del portalgu del
Huerna. Ello ye que Zapatero namás que pudo afirmar qu'esti plan va ser
favorable p'Asturies, y que nestos momentos ta negociándose ente'l
Ministeriu d'Industria y los sindicatos, y que s'espera que les negociaciones
lleguen a bon puertu. No que cinca al portalgu del Huerna, Zapatero nun lo
menciónó directamente, anque comentó qu'a primeros de 2006
se fadría una propuesta pa meyorar les comunicacioens ente Asturies y
la meseta.