Zamora, Badalona, UD Logroñes, Ebro y Cádiz, rivales en Copa

El Lealtad va recibir al líder de Segunda na primer ronda de la competición. Sporting, Uviéu y Marino van xugar fuera la so eliminatoria y l'UP Langreo, en casa.

Los equipos asturianos yá conocen los crucies coperos, que col formatu nuevu van ser a partíu únicu hasta semifinales. El Sporting va enfrentase al Zamora, líder del grupu 8 de Tercera, mentes que l'Uviéu va facelo con un conxuntu de Segunda B, el Badalona, anguaño en puestos de descensu nel grupu 3. 

El Marino tuvo la mala fortuna de tener que viaxar fuera y, amás, pa xugar contra ún de los equipos potentes de la categoría, la UD Logroñés, en puestos d'eliminatories d'ascensu. Mentes, l'Unión va recibir al Ebro.

En Villaviciosa finalmente nun van recibir a un Primera, pero sí al equipu de Segunda que más cerca ta de tar la próxima campaña na máxima categoría: el Cádiz. Los d'Álvaro Cervera van visitar Les Caleyes na selmana del 18 d'avientu, fecha prevista pa esta primer ronda de la Copa, de la que quedó exentu'l Yeclano.

Semeya propiedá de la Real Federación Española de Fútbol (RFEF).