Selmana de les Lletres Asturianes

“Ye’l momentu de comenzar un diálogu que remate cola oficialidá nel 2021”, reclama Ripa

|
Aconceyamientu Podemos y Iniciativa pol Asturianu

Representantes de Podemos, ente les que taba la edil xixonesa Laura Tuero, aconceyaron con Iniciativa pol Asturianu dientro de la serie d’entrevistes con grupos parllamentarios qu’entamó’l coleutivu. “Ye’l momentu de comenzar un diálogu que remate cola oficialidá nel 2021”, reclamó’l secretariu xeneral Daniel Ripa, mentes qu’Iván Llera treslladó a la formación la importancia del consensu.

Nel alcuentru, celebráu de forma telemática la selmana pasada, tamién participaron Pablo Martínez Testa, responsable de Política Llingüística de Podemos, y Antón Caamaño, representante de Podemos Xixón nel Conseyu Asesor de la Llingua de Xixón, y Inaciu Galán, vocal de Rellaciones Institucionales d’Iniciativa pol Asturianu, organización que fixo delles propuestes pa dar una presencia normal a la llingua asturiana nes redes y la páxina web de la formación. Tamién aprovechó la presencia de Tuero pa comentar delles cuestiones relatives al emplegu de la llingua asturiana en Xixón.

A nivel nacional el coleutivu de reivindicación llingüística calcó na importancia de consiguir el máximu consensu posible de los partíos de la Xunta Xeneral pa llograr la oficialidá dientro de la reforma estatutaria. “Ye importante sumar el mayor númberu de votos afirmativos y el menor númberu de votos en contra”, apuntó Llera.

Ripa declaró, tres la xunta, que “tien qu’empezar el procesu de diálogu pa una reforma estatutaria qu’oficialice l’asturianu y el gallego-asturiano, qu’asegure el fin de la discriminación llingüística. Ye’l momentu de comenzar un diálogu que remate cola oficialidá nel 2021”.

Pa ello pide “un diálogu ampliu, una reforma del Estatutu d’Autonomía qu’incorpore al mayor númberu posible de fuercies polítiques y de sensibilidaes ideolóxiques, col fin de que toles persones n’Asturies tengan los mesmos derechos, falen la llingua que falen. Cada vez ta más aceptao socialmente que la llingua ye un patrimoniu de toos y toes, al marxe de la ideoloxía”.

Amás, insistió en que, nesta situación actual por mor de la pandemia, “la oficialidá puede suponer un pegoyu pa la protección de derechos, pa la protección social y tamién pa la reactivación económica”. Tamién fixo referencia a la llaceriosa situación del profesoráu de Llingua Asturiana y de Gallego-asturiano al tar paralizada la creación de la especialidá docente, “una xera que-y ponemos al Gobiernu de coalición en Madrid, que ye’l que tien qu’acabar con una situación inxusta pal profesoráu d’asturianu».

Ausencia del idioma nel Xovellanos

Los representantes d’Iniciativa pol Asturianu aprovecharon la presencia de Tuero pa comentar delles cuestiones relatives a la presencia de la llingua asturiana en Xixón. Llera espuso la situación del idioma na información del Teatru Xovellanos, na cartelería o la web del idioma, onde desapaeció: “Tamos detectando ciertos retrocesos n’ámbitos onde l’usu del idioma taba afitáu y que vamos llevar al prósimu Conseyu Asesor de la Llingua de Xixón”, que taba convocáu pa esta tarde, pero que s’aplazó tres la dimisión ayeri del conceyal d’Educación y Cultura.

“Hai coses bien cencielles de facer. La web del Ayuntamientu camudóse va un añu pero desapaeció la versión n’asturianu; va un añu que dende la Oficina de Normalización Llingüística tán tornando conteníos al asturianu pero, naide sabe por qué, nun tán subiendo nada a la web municipal”, criticó Tuero. Tamién llamentó la so ausencia na programación del Xovellanos o demandó correición llingüística n’EMTUSA y EMULSA, empreses municipales onde “tán faciéndose bien les coses, pero hai que meyorar dalgunos aspeutos” como la correición llingüística.

Contador Estadistiques