"Ye una cuestión de voluntá política", recuerda Llera sobre la especialidá na Sestaferia

El presidente d'Iniciativa pol Asturianu reclama al ministeriu y a la conseyería "una igua definitiva pa esta llamentable situación".

La organización tuvo presente con un puestín informativu esti miércoles na IX Sestaferia Educativa que se celebra en La Felguera cola presencia de más d'un centenar de maestros y maestres de Llingua Asturiana y Gallego-asturiano, y aprovechó pa dar el so sofitu al profesoráu na so demanda de creación de la especialidá docente, negada pol Ministeriu d'Educación, y p'agradecer el "trabayu que faen caldía" pa "salvar y enseñar l’idioma frente a tantes dificultaes". "Llograr esta reconocencia supondría un fitu perimportante pa la dignificación del asturianu y el gallego-asturiano y de l’asignatura, y valdría pa dar estabilidá a la materia y al propiu profesoráu", aseguró Iván Llera.

“La reconocencia de la especialidá docente ye una demanda hestórica de la comunidá educativa asturiana y tanto la Conseyería d’Educación, la Direición Xeneral de Política Llingüística y el Ministeriu d’Educación tienen que buscar una igua definitiva pa esta llamentable situación. Ye’l momentu de finar con una inxusta desigualdá llaboral y dar l’estatus que merez a l’asignatura de Llingua Asturiana", añadió'l periodista.

Nesti puntu, recordó que la so aprobación "ye una cuestión de voluntá política" y recordó la esistencia d'un informe de la Conseyería de Cultura, Política Llingüística y Turismu "qu'avala la creación de la especialidá docente ensin oficialidá cola mesma validez y efectos que les demás rames educatives". "Nun ye esplicable que siendo una cuestión que xeneró yá delles votaciones unánimes de la Xunta Xeneral, y tando nel programa de cásique tolos partíos, nun se diera yá solución a esti problema que lleva xenerando dificultaes dende va más de trenta años", siguió.

Na semeya, Llera al frente del puestín informativu.