"Ye dalgo mui grave", afirma Fernández Muñiz sobre'l señalamientu de VOX a diputaos

|
Pablo Ignacio Fernández Muñiz Comisión de Salú ataque VOX a Pumares

El conseyeru amosó'l so refugu a estes práutiques na Comisión de Salú.

Pablo Ignacio Fernández Muñiz comparecía esta mañana pa informar de los alcuerdos del Conseyu de Gobiernu frente a la COVID-19 y la primera n'intervenir nel turnu d'entrugues foi la representante del grupu parllamentariu VOX, Sara Concepción Álvarez Rouco, que preguntó sobre la tercer dosis de la vacuna. Énte les respuestes recibíes, la diputada insistió hasta'l puntu de facer saltar al conseyeru: "Voi dar una esplicación, si me permite, señor presidente, pero güei ta costándome responder a la vocera de VOX porque nun sé si van sacar unos cartelos cola mio semeya y una equis si les mios respuestes nun-y presten, una equis que nun sé si significa que se calle la boca o que lu tán marcando pa dalgo", señaló en referencia a les valles publicitaries de VOX contra la cooficialidá usando la imaxe d'Adrián Pumares, que taba presente na sala.

Álvarez Rouco reclamó una respuesta y afirmó que "nun sé a quién vien esto. Si vusté quier dicime dalgo, meyor fuera, pero non nuna comparecencia de sanidá". "Ye esmoleciente que tean faciendo una campaña na que tán marcando a xente, porque a toos nos preocupa saber qué ye lo que pretenden.Toos imaxinamos el día de mañana que tuvieren vustedes gobernando, lo que ye posible, nun hai que descartalo, nel que tornen a facer lo que fixeron na historia d'España. Poro, tien qu'entender que m'esmoleza que les mios respuestes puedan ser orixe de que tamién me marquen, como faen a dalgunes de les persones que tamos equí. Ye grave, señoría", siguió Fernández Muñiz.

Contador Estadistiques