Día del Llibru Asturianu

"Ye ablucante qu’una dirixente política asturiana s’atreva a espresase nesos términos", afirma l'ALLA

|

La institución académica, escandalizada énte'l tweet col que Mercedes Fernández "facía alarde del so 'llogru' anti-asturianu". Les organizaciones en defensa del idioma tamién salen al pasu pola polémica xenerada pola presidenta del PP n'Asturies. Iniciativa fala de "discriminación" y la XDLA d'una vuelta "al periodu predemocráticu"

"Hemos logrado que el castellano sea la única lengua del parlamento en #Asturias" presumía ayeri Fernández tres la prohibición d'emplegar l'asturianu na Comisión d’Estudiu sobre Réxime, Proteición y Promoción del Asturianu. Esto ye, l'usu de la llingua asturiana pa tratar sobre la llingua asturiana.

Por ello, l'Academia de la Llingua Asturiana (ALLA) "quier treslladar a la opinión pública asturiana la so más fonda esmolición énte la falta de respetu hacia la nuesa llingua de los parllamentarios qu’afalaron tal prohibición na Xunta Xeneral". "La verdá ye que ye difícil alcontrase con una manifestación tan inequívoca de despreciu a Asturies, d’autoodiu y de falta de sensibilidá pa cola cultura de los asturianos. Y dende llueu, ye ablucante qu’una dirixente política asturiana s’atreva a espresase nesos términos", apunten dende la institución nun comunicáu.

La oficialidá, caltién l'ALLA, supondría "la igua de situaciones como les qu’acabamos de describir", polo que pide a tolos grupos parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en toles instituciones del país y, n’especial, na Xunta Xeneral, muérganu máximu de representación de los ciudadanos y ciudadanes d’Asturies".

Ataque agresivu a la llingua asturiana

Iniciativa pol Asturianu nun tardó n'emitir un comunicáu tres conocer la situación de la comisión y les pallabres de Fernández. "Tamos énte una de les acciones más llamentables contra l’asturianu de los últimos años, yá que Mercedes Fernández y el so partíu presumen nos medios de discriminar a los falantes d’una de les llingües d’Asturies y afonden nos prexuicios yá superaos pola mayor parte de los asturianos, que nun entienden, como nun entendemos nós, que s’ataque d’un mou tan agresivu a una llingua que ta nuna situación de gran debilidá cuando se trata de facer un usu que nun pasa de lo simbólico y pa falar de la propia llingua".

Tamién critica la postura de la FSA-PSOE y Ciudadanos —votación a la que tamién se sumó Foro— "sofitando la prohibición del PP d’usar l’asturianu nesta comisión, siendo cómplices d’esti llamentable ataque a los falantes d’asturianu, que ven como los insulten los sos representantes na Xunta Xeneral". D'igual forma, Iniciativa pol Astuiranu entrúgase "cómo ye posible que’l PP califique de 'pequeña victoria importante' un 'llogru' antidemocráticu y anticonstitucional como ésti y qu’al mesmu tiempu tengan l’atrevimientu de falar de que quieren 'que el bable forme parte de nuestro acervo cultural', mientres faen tolo posible p’acabar col idioma".

Por ello, esixe "al PP y a les fuercies polítiques qu’apoyaron al so propuesta na comisión, una rectificación total y que se permite usar l’asturianu con total normalidá, cola mesma normalidá cola que los asturianos usen cada día la so llingua nes cais y nos caminos d’Asturies".

"Pa esconder casos de corrupción"

Pela so parte, la Xunta pola Defensa de la Llingua Asturiana (XDLA) califica "l'actitú totalitaria del PP d'ataque grave a los valores constitucionales qu'esti partíu diz defender". "La derecha consigue l'apoyu de los socialistes pa volvenos de golpe al periodu predemocráticu, nun intentu claru d'usar l'asturianu como polémica pa esconder los casos de corrupción qu'afueguen al PP", continúa la organización cívica nun comunicáu.

"¿Cómo pue un representante públicu de l'Asturies democrática del sieglu XXI mostrar el so contentu por nun dexar usar l'asturianu na sede de los representantes d'Asturies nin siquiera de manera testimonial?", entrúgase la XDLA, que llamenta que nin se permita una "presencia anecdótica y testimonial" del idioma na cámara de tolos asturianos. Esti coleutivu, sicasí, diz nun sorprendese pola "actitú antidemocrática de Mercedes Fernández, porque nel so periodu de delegada del Gobiernu yá anuló les declaraciones y ordenances a favor de la oficialidá qu'impulsaron dellos conceyos".

L'actitú de la FSA tamién ye criticada pola organización cívica, yá que "depués de votar a favor d'una proposición pa un plan de dignificación del asturianu —onde se diz literalmente que ye dificilmente xustificable que nuna sociedá democrática y avanzada se desprecie lo que representa la llingua asturiana—, acaba d'escaecer tolo alcordao pa dir de la mano de la derecha más rancia y intolerante".

Pa finar, la XDLA pide "a los partíos políticos qu'apoyaron estes midíes que tomen nota y, amás de pidir una rectificación inmediata a los socialistes —convertíos nos principales validores de la política uniformadora y totalitaria de la derecha—, valoren el grau d'enfotu que tien la FSA pa posibles alcuerdos futuros". D'igual forma, solicita "un posicionamientu claru del Gobiernu asturianu y del presidente de la Xunta Xeneral contra esta actitú intolerante y intolerable pa col nuestru idioma, que lo que necesita agora ye protección y respetu y non prohibiciones y represión".

 

Contador Estadistiques