Yá ye posible lleer a Aníbal González y el so 'Anatomía d'un farfagón'

El poemariu d’Aníbal González Rodríguez ganador del Premiu Asturies Moza de poesía del 2021, ‘Anatomía d’un fargagón’, yá ta disponible pa la so llectura. Esti miércoles presentóse’l llibru d'esti autor nuevu, editáu por Trabe, xunto con ‘Muerdo’ y ‘Tiempos de penuria’, obres gallardonaes en narrativa y en testos teatrales, de manera respeutiva.

Inaciu Galán encargóse de presentar el títulu d’esti escritor que s’estrena nes lletres asturianes, yá qu'hasta agora namái tenía espublizaos poemes sueltos. Foi nun actu celebráu na uvieína Biblioteca d’Asturies ‘Ramón Pérez de Ayala’ nel que González Rodríguez tuvo acompañáu poles otres dos ganadores, Nuria Barranco (narrativa) y Ivana Castañón (testos teatrales), y el direutor xeneral de Mocedá, Diversidá Sexual y Derechos LGTBI, Marcos Torre.

‘Anatomía d’un fargagón’ ye un poemariu esperimental y variáu que trata los temas eternos del ser humanu como la muerte, la vida, l’amor o la falta del mesmu, el pasar del tiempu y la señardá d’ello, ensin escaecer l’amor a la naturaleza. Inclúi, en pallabres del autor, poemes cívicos y otros políticos nos que se reflexa la muerte de les mines y del proletariáu.

Esta obra de González conviértese nel númberu 74 de la coleición ‘Texu’ de Trabe, nos que s’inclúin tolos títulos d’esti concursu del programa ‘Culturaquí’ qu’entama la Conseyería de Presidencia pa promover la creación artística xuvenil nes distintes modalidaes que conformen les artes plástiques, la lliteratura o la música, y fomentar la participación de la xente mozo con esmoliciones artístiques. La recompensa d’estos trés premios lliterarios son 1.000 euros y 50 exemplares del llibru pa cada autor.

Na semeya, González, a la izquierda, con Galán nel otru estremu.