Yá ta disponible'l programa de la Selmana de les Lletres

La Oficina de Política Llingüística yá tien disponible'l programa de la XXVI Selmana de les Lletres Asturianes. Como yá adelantáremos n'Asturies.com, esta edición va dedicase por primer vegada a un xéneru y a unes xeneraciones y non a un autor en concreto, y asina, baxo'l títulu "Poesía en Movimientu", la selmana va ofrecer actividaes de toa triba dende'l 29 d'abril hasta'l 19 de mayu en delles villes y ciudaes d'Asturies. Ente elles, recitales de poesía qu'amás van contar con delles particularidaes según en que llugar se faigan. Asina, el recital d'Avilés va incluyir l'espactáculu "nueche d'insomniu"del cantautor Toli Morilla, mientres que nel casu de Llangréu va facese tamién un pase d'un musical sobre la figura del musicólogu asturianu Eduardo Torner. Otru héroe local, el cantautor Pedru Pereira, va tener tamién protagonismu propiu nel recital a celebrar en Cangas del Narcea.

Sicasí, l'actu central de la Selmana queda acutáu pa la capital, Uviéu, onde'l 6 de mayu, nel Auditoriu "Príncipe Felipe" va celebrase un macrorecital de poesía nel que va contase cola presencia de dos convidaos de rellume. Per una parte, el premiu Nóbel de lliteratura del añu 1995, l'irlandés Seamus Heaney y per otra'l Premiu Nacional de Poesía d'España Luis García Montero. El poeta irlandés va pronunciar amás el día 4 de mayu nel paraninfu de la Universidá d'Uviéu la conferencia "Poesía y Territoriu" mientres que l'español coordinó pa la Selmana de les lletres la edición d'una antoloxía poética que va entitulase "pallabres clares"

Otres actividaes clásiques de la Selmana de les lletres caltienen el so sitiu nel programa. Nun falta'l Día del llibru y el discu n'asturianu, que va ser el 6 de mayu, nin tampoco'l tradicional llibru-regalu que s'entrega esi día con artículos y estudios sobre'l tema central de la Selmana de les lletres, volume que coordinó esti añu Lourdes Álvarez. Otramiente, la Conseyería d'educación va tener actos propios nesta selmana, incluyendo ente ellos l'actu central que va facese na Pola Siero y la "Selmana das letras" con actividaes pa los escolinos del Navia-Eo.

Pero tampoco nun dexa d'haber llugar pa la sorpresa y la novedá, y una d'elles ye la que cuerre a cargu de los diputaos de la Xunta Xeneral del Principáu. Nun van ser toos los que tean, pero si que se trata de que les sos señoríes, pertenecientes a los trés grupos con representación en Parlamentu Asturianu xuban al estráu pa ller el poema n'asturianu qu'ellos mesmos escueyan.

Otramiente, la Selmana de les Lletres va afondar nel camín del audiovisual qu'abriere l'añu pasáu col documental sobre Andrés Solar. Lo que va facese pa esti añu va ser un DVD con una parte d'imaxe y otra sonora basáu na obra de diez poetes asturianos. Les emisiones de RTVE y de RNE n'Asturies van reproducir los materiales d'esti DVD.

Ver equí'l programa de la XXVI Selmana de les lletres