Yá! sal a la venta

Dende güei llunes ya pue topáse nes tiendes de discos y na nuestra tienda n'internet l'últimu discu d'estudiu de "Felpeyu".



Depués d'una llarga espera por fin sal a la venta n'Asturies y nel restu l'estáu "Yá!", el cuartu trabayu discográficu de los xixoneses "Felpeyu". Esti discu grabóse va ya pa un añu, pero'l grupu decidió nun tener priesa a la hora de preparar el discu pa tar seguros de que'l resultáu final yera'l qu'ellos queríen, gracies a ello'l discu tien una perbona producción musical y un diseñu de la carpeta orixinal y prestosu.



El discu son doce cantares, con cinco cantaos con lletres de Boni Pérez, Igor Medio y Ruma Barbero, onde'l grupu afonda nel so apueste por un folk acústicu onde la cuerda marca la pauta y onde garra gran importancia les voces. Na banda nótase un saltu cualitativu dende aquel "Tierra" del añu 97, la esperiencia y la incorporación d'instrumentos y músicos nuevos nel grupu faese notar.



Por agora nun ta prevista nenguna presentación del discu, la lesión que sufre'l guitarrista del grupu Carlos Redondo nuna mano fai que "Felpeyu" nun pueda facer una presentación curiosa d'esti discu hasta xunu. Si queréis escuchalu "Yá!" ya se pué mercar esti cd na nuestra tienda n'internet Asturshop.