Yá hai fecha pal homenaxe a Fierro

La selmana pasada Asturies.com adelantaba la noticia de que taba preparándose un homenaxe a la figura del cura xesuita y destacáu asturianista Federico Fierro Botas, desapaecíu a consecuencia d'un accidente de coche en Rusia. Los colectivos qu'entamen los actos, de los que Fierro militaba en bien d'ellos, celebraron esti vienres un conceyu en que s'alcordaron la fecha y los conteníos del tributu al intelectual asturianista, que va ser, de nun apaecer problemes, el prósimu sábadu 28 de setiembre. La xornada tendrá d'una parte un actu relixosu y otru laicu. El primeru consistirá nuna misa que se dirá a les 6 de la tarde na parroquia de San Esteban del Mar, nel barriu xixonés d'El Natahoyo, onde Fiero vivía y trabayaba, mientres que l'actu laicu sedrá un poco depués nel Antiguu Institutu Xovellanos, onde se lleerán dellos testos espeyando toles estayes qu'abarcó esti asturianista de fonda formación humanística.Les persones y entidaes que promueven l'homenaxe quixeron esclariar qu'en negún casu quier facese un contra-funeral n'oposición al funeral oficial que dio l'arzobiespu d'Uviéu Carlos Osoro y que xeneró abonda rocea por nun facer referencia nenguna al papel de Fierro como defensor de la llingua asturiana. Pa los convocantes d'estos actos, ente los que tan el Coleutivu Manuel Fernández de Castro, ex-alumnos de Fierro, PAS, IX y IAS, trátase namás de facer un actu en que se remembre'l labor más asturianista de Fierro ensin entrar a polémica denguna cola Ilesia Asturiana.