Yá hai 700 páxaros petroliaos

Anque les playes y pedreros tan garrando fuelgu enantes de que llegue la cásique segura segunda marea negra, les aves son el testimoñu de lo qu'hai flotando na mar. A última hora d'ayeri, nos centros de recuperación de L.luarca y d'Avilés yá contaben 682 páxaros (482 d'ellos con vida), y colos primeros que tan llegando güei yá se pasa de 700. Namás nel día d'ayeri, rexistrose la entrada de 150 páxaros petroliaos, y, anque los datos oficiales del Principáu nun estremen per especies, si ye cierto que los araos son los que tan dañándose más col galipote, anque tamién entren a los centros de recuperación otres especies como'l draque o'l raquín.

Énte la cantidá tan grandísima de páxaros que tan llegando, el Principáu diz que van abrir otru centru d'atención nes instalaciones de Cogersa nel que llavar y guardar los páxaros según vayan desintosicándose de galipote, en cuenta de llevalos a Pontevedra, como se pensó de mano, y ye que'l centru gallegu yá nun da abastu a páxaros. Los que tampoco son pa colos páxaros que tan pañando son los cántabros, que namás tienen un puntu de tratamientu, con perpocos medios materiales, en Cabárceno. Ye fácil que les instalaciones asturianes, yá estragaes de pacientes, tengan que tratar tamién lo que-yos venga de la comunidá vecina.

De momentu, el bon llabor que tan faciendo voluntarios y veterinarios que trabayen turnos d'hasta 12 hores colos páxaros ta valiendo pa qu'haya tantos per cientu mui altos de supervivencia, pero ello tamién plantega un problema más, que ye qué facer colos páxaros cuando se recuperen dafechu, y ye que, en cuantes que la marea negra sigue sobre'l Cantábricu, fai falta llevalos lloñe. Ente les alternatives tan el soltalos en Portugal, Andalucía o Bretaña, anque lo más seguro ye que tenga qu'escoyese ente les dos primeres, y ye que de dexalos en Bretaña col inviernu ya metíu lo más fácil ye que quieran tirar pa contra'l sur y vuelvan p'acá.