… y volvió’l bon fútbol al Tartiere

Gran xuegu'l que desendolcó l'Uviéu nunos impresionantes primeros 60 minutos que vinieron marcaos pol cambiu tácticu fechu por Rivas y la gran actuación de Michu. Un cambéu tácticu qu'implica gran esfuerciu físicu de Benxamin, únicu pivote, pero pol contrario supón un gran control del xuegu y abre gran cantidá d'opciones ofensives con Jon Carrera y Michu.

Na primer metada vióse'l meyor fútbol de va tiempu nel Tartiere con un dominiu absolutu sobre un Siero que paeció nun tener pensao atopase con un Uviéu tan fuerte. L'Uviéu yera'l dueñu del balón y siempre lo xugaba con criteriu nel centru'l campu amás de cuntar coles peligroses entraes d'Alberto y Rubén y la gran movilidá de Darío na punta d'ataque.

Michu foi'l xugador que marcó'l ritmu del partíu, d'una aición de so nació'l primer gol del Uviéu. Dempués de combinar con Alberto, entró nel área y aguantó'l balón hasta poder da-ylu a Darío que completamente solu mandólu al fondu la portería polesa consiguiendo'l so octavu gol d'esta temporada. Solo dos minutos dempués d'esti gol, Michu fizo la xugada de la tarde al dise de tolos contrarios que-y salieron al pasu per aciu paredes y regates hasta llegar a la llinia del área y executar, perbaxo y axustáu al poste, un gol perguapu.

Foi la meyor primer parte de va tiempu nel Tartiere, el Siero vióse superáu por un gran R. Uviéu qu'amás de controlar el partíu xugaba con gran verticalidá, esta superioridá espeyóse en que'l Siero malapenes pasó del centru'l campu col pelotu y nunca nun tiró a puerta na primer metá.

El segundu tiempu entamó más enguedeyáu, pero cuando solo diben 10 minutos, Jon Carrera acabó col partíu al executar una falta al borde l'área d'una forma maxistral. D'equí al final l'Uviéu baxó'l ritmu, notóse'l cansanciu de Michu, cosa qu'aprovechó Mario pa faer el gol del honor del Siero, yera'l minutu 20 pero'l partíu yá acabara col tercer gol del Uviéu al entamu la segunda parte.

En definitiva, gran xuegu'l desplegáu por un Uviéu que cambió d'esquema y qu'otra vuelta acumula tres victories siguíes a la espera d'otru interesante partíu a xugar contra l'Universidá'l próximu domingu.