Yá ta na cai l’Anuariu de la Música Asturiana 2010

El responsable de Discos L'Aguañaz y vocalista del grupu Dixebra, Xune Elipe, presentó'l vienres 17 l'Anuariu de la Música Asturiana 2010.

Esta revista fai nel so editorial, una crítica al poco pesu que la infraestructura cultural asturiana dedica a los grupos y intérpretes llocales. Amás, acompáñense artículos de dellos grupos, y reportaxes sobre la edición d'esti añu del Festival Intercélticu de Lorient o'l concursu del Meyor Cantar n'Asturianu, ente otros temes.
  
Na so intervención en rueda prensa, Xune Elipe fizo un repasu pelos conteníos de la publicación, un clásicu d'estes feches pa tolos aficionaos a la música asturiana. Tamién esplicó que l'Anuariu de la Música Asturiana ta disponible nos quioscos asturianos dende'l mesmu vienres 17 d'avientu a un preciu de 5 euros, y que tamién pue adquirise na páxina web www.ambitu.com, entrando nel apartáu Tienda.
  
L'editorial d'esti númberu nuevu del Anuariu de la Musica Asturiana ta dedicáu a les infraestructures culturales que s'asitien nel país y a los sos conteníos que, según la publicación, bien de veces dexen de llau o desdexen la presencia de los grupos y intérpretes asturianos. Ente los sos conteníos destaquen, por exemplu, artículos sobre Corquiéu, Blima, Falanoncaduca, Skontra, Güextia, etcétera; reportaxes sobre'l Premiu al Meyor Cantar n'Asturianu d'esti añu, que se desenvolvió en Mieres y que ganó la formación Xera; entrevistes con Skama la Rede o Misiva; crítiques de discos como'l nuevu d'Anabel Santiago; informes sobre la edición númberu cuarenta del Festival Intercélticu de Lorient; o una alcordanza sobre'l músicu Fernando Largo, que morría hai unos meses.

Nun va faltar tampoco la sección llamada 'Collecha', onde se fai un recuentu exhaustivu de tolos discos, publicaciones y audiovisuales que tienen a la música asturiana como protagonista. Nesti sen, faise un repasu de les cerca de trenta producciones discográfiques de música tradicional, folk o soníos contemporáneos n'asturianu publicaes nesti añu 2010, amás d'a los ocho llibros o revistes y los tres DVD o videoclips que foron apareciendo nestos doce meses.
  
Como tolos años, l'Anuariu de la Música Asturiana ufierta una visión percompleta de tolo socedío nesi terrén nestos 365 díes. Amás, preséntase con un diseñu mui atractivu y unos conteníos firmaos por periodistes, músicos, críticos y escritores.

Esta revista, que cumple once años de vida, ta centrada na actualidá anual de la música que tien a los soníos de calter tradicional como elementu fundamental d'inspiración (bien sía recuperándolos o reellaborándolos) y a la que s'espresa en llingua asturiana, independientemente del estilu que sía (rock, pop, canción d'autor, jazz o reggae).