Xustu repartu puntos nun disputáu partíu en Mieres

Interesante y disputáu partíu'l xugáu esti domingu ente'l Real Uviéu y el Caudal de Mieres y que tuvo una gran asistencia de públicu nel Hermanos Antuña.
Un Uviéu que sigue mostrando muncho oficiu y poca brillantez nel xuegu, atopóse un rival seriu, permotiváu y con un fútbol demasiáu duru que l'árbitru nunca nun supo cortar. Rivas paez qu'optó nos últimos partíos por faer un apueste pola llucha y el control en detrimentu del espectáculu y bona distribución del xuegu al que nos tenía avezaos un Benxamín qu'últimamente ta abonáu al bancu.
Tres de 25 minutos de xuegu nel centru'l campu ensin malpenes ocasiones de gol, Yeray que cada vez ta más motiváu ya integráu nel proyeutu d'esti equipu sufrió una falta que sacó Rubén y Luismi, de certeru cabezazu, mandó a la rede de la portería caudalista. Poco dempués, l'arbitru anuló un gol a Darío que pudo cambiar el signu del partíu.


Na segunda parte'l Caudal salió muncho más motiváu y disfrutó de dalguna ocasión de gol, la más clara una falta que Falo llanzó al palu izquierdu de Rafa Ponzo. Frutu d'esta motivación y d'una polémica decisión arbitral llegó l'empate caudalista. Yera'l minutu 30 cuando Merino entró nel área y chocó con Urizar, l'arbitru nun tuvo nenguna dulda y rápidamente-y sacó tarxeta mariella al xugador del Caudal, pero por mor de les protestes caudalistes consultó al llinia pa volvese atrás na so decisión señalando un discutidísimu penalti que Falo s'encargó de tresformar no que sedría'l definitivu empate. Dempués d'esti gol muncho xuegu duru que l'árbitru nun cortó nin midió d'igual forma pa los dos equipos y qu'acabó con Luismi na caseta de forma inxusta.
En resume, xustu repartu de puntos al que se llegó de manera enforma polémica, un resultáu que paeció convencer a dambos equipos y que sigue permitiendo al Uviéu disfrutar d'una comoda ventaxa na tabla clasificatoria.