Xuristes pol Asturianu presenta'l so dictame sobre'l Conflictu Llingüísticu n'Asturies

L'Asociación "Xuristes pol Asturianu" presenta en Xixón esti llunes 2 d'abril, a les 20 hores, na sede de la "Sodiedá Cultural Xixonesa" asitiada na cai Belmonte númberu 4, el so estudiu "Dictame sobre'l conflictu llingüísticu n'Asturies", ún actu públicu al que puen asistir toles persones interesaes. L'Aconceyamientu de Xuristes pol Asturianu, que lleva funcionando dende va dellos meses, fórmenlu un grupu d'abogaos y profesionales del derechu, ente ellos Xosé María Estrada Janariz, Xurde Blanco Puente y Xesús Xabiel Álvarez Villa, axuntaos toos ellos alredor de la defensa de los derechos llingüísticos n'Asturies. El dictame xurídicu sobre'l Conflictu Llingüísticu n'Asturies ye ún de los primeros trabayos del grupu que güei se presenta y nelli llégase a la conclusión de que'l fechu de nun declarar l'asturianu como llingua oficial "ye nestos momentos un desacatu a la Constitución Española, asina como a otros convenios y trataos de calter internacional" espeyando como la llingua asturiana y los sos falantes son discriminaos na aplicación de los artículos 3.2 y 3.3 de la Constitución Española.