Xuntanza pola defensa de los Fondos de Cohexón

La perda de la mayor parte de la financiación de la Xunión Europea como consecuencia de la entrada de los Países del Este d'Europa ta metiéndo-yos munchu mieu a los receptores actuales d'esos fondos que, como Asturies, tienen gracies a ellos una vía d'ingresos básica pal sofitu de tou tipu d'infraestructures.

Por too ello los afectaos tan moviéndose y negociando pa facer un frente común na defensa de los intereses comunes. Nesi sentíu más d'una docena de rexones europees tan acabante de firmar n'Asturies el nomáu Documentu d'Uviéu nel que se recueyen les bases d'esti grupu de presión. Ente este bases destaquen el rechazu a rebaxes adicionales nes ayudes y el derechu al réxime d'ayudes estatales. De toles formes esti documentu ye de mínimos, ya que ye difícil amestar los estremaos intereses de los afectaos en cuantes que caún tien unes característiques socioeconómiques distintes. Xunta Asturies firmaron esti documentu Ática (Grecia); Highlands, Merseyside y Gales (Reínu Xuníu); Valonia (Bélxica); Algarve (Portugal); Basilicata (Italia); Brandenburg, Sachsen-Anhalt y Meckenburg-Vorpommern (Alemaña); Murcia. Ta previsto que tamién lo firmen Burgerland (Austria), Thüringen (Alemaña) East Finland (Finlandia) y Yorkshire-Humberside (Reinu Xuníu). El grupu de presión esixe tamién garantíes pa una adecuada financiación de los proyectos, pero'l casu ye que cola Europa de los 25 los fondos de cohesión p'Asturies, neto que pa otros munchos receptores tienen fecha de vencimientu. Como consecuencia, nel futuru inmediatu Asturies va pasar de recibir de los 190 millones d'euros anuales d'anguaño a poco más d'un centenar de millones.