Xunta Moza, optimista énte la fuelga d’enseñances medies

La organización xuvenil de la Xunta Pola Defensa de la Llingua caltién pa mañana la convocatoria de paru nos centros d'enseñances medies d'Asturies.

Los militantes de Xunta moza, la organización xuvenil de la Xunta Pola Defensa de la Llingua Asturiana, cuenten con que'l paru que tienen convocáu pa mañana nos institutos d'enseñances medies asturianos seya un ésitu y emponderen tanto'l trabayu de la organización a lo llargo d'estes selmanes como la rempuesta de los estudiantes de medies

Xulio Casado, representante de Xunta Moza, esplicó a Asturies.com que la organización cuenta con que mañana haya una rempuesta importante a la convocatoria de paru entamada en protesta pola situación del asturianu nel sistema educativu. Ello ye que nestes selmanes de preparación de la fuelga, que supón una preba de la capacidá d'enganche social de la reivindicación llingüística colos sectores más mozos de la sociedá, Xunta Moza repartió más de 30.000 cartafueyos llamando a la fuelga y pegó más de 1.500 cartelos nos institutos de toa Asturies. A esti esfuerzu respondieron los estudiantes, y, según Casado, hai xuntes de delegaos y colectivos d'estudiantes de conceyos de tola xeografía asturiana que yá confirmaron que mañana van facer paru, casu de Nava, Turón, Llanes y Cangues d'Onís.


Con too y con ello, Casado alvirtió d'un peligru ciertu pal ésitu de la convocatoria na oposición activa de parte del profesoráu y la directiva de bien de centros que, en teniendo conocimientu de la fuelga, programaron controles y esámenes pal día de mañana como una midida disuasoria a la participación nel paru y nes dos concentraciones de protesta convocaes, la primera na Plaza d'España n'Uviéu, onde s'asitia la a les 12h y la segunda a les 12:30h na Plaza Mayor de Xixón. Xulio Casado ve nestos esámenes puestos a costafecha pa paralizar la fuelga la demostración de la esistencia d'un conflictu real pola escolarización del asturianu y d'una política represora dende delles instancies.