Xunta Moza llama a la fuelga nos institutos esti miércoles

La Xunta Moza, estaya de mocedá de la Xunta pola Defensa de la Llingua Asturiana, presentó esta mañana la convocatoria pa una fuelga d'estudiantes que va facese'l prósimu miércoles 23 de payares.

Los representantes de Xunta Moza esplicaron qu'esta midida gárrase, por segundu añu consecutivu "en rempuesta a la situación de marxinalidá na que s'atopa la llingua asturiana nel sistema educativu y polos incumplimientos, por parte de la Conseyería d'Educación, sobre la ufierta de l'asignatura d'asturianu, que son especialmente graves y sistemáticos na educación secundaria y bachilleratu."

La organización, que remembró que la fuelga que convocare'l cursu pasáu por motivos asemeyaos resultare un "éxitu ensin precendente", con un paru que la organización peritó en cerca del 90% en toa Asturies, afirma que les demandes que s'espunxeron d'aquella siguen ensin respuesta per parte de la Conseyería d'Educación, "siendo constantes y en dellos casos entovía más graves" los incumplimientos que se dan no tocante a la escolarización del asturianu.

El fechu de que l''asignatura d'asturianu apaeza como optativa y non como voluntaria como diz la llei, enfrentando'l conocimientu d'asturianu col d'otres asignatures y el que s'impónga un cupu mínimu de 8 estudiantes por cursu pa ufrir l'asignatura d'asturianu, lo que vulnera'l derechu individual a cursala, faciéndolu depender de la elección del restu los compañeros y compañeres" sedríen pa la Xunta Moza dos de les infracciones más graves, anque la organización remembra qu'amás d'ello "na práctica, na mayoría de los institutos nun se respeta'l cupu, y en munchos centros hai grupos d'hasta 15 estudiantes que pidieron cursar l'asignatura de llingua asturiana y a los que nun se-yos pon profesor, obligándolos a matriculase n'otres optatives".

Xunta Moza sorraya que nesti cursu escolar "hai bien de centros onde nin siquiera apaez la opción de l'asignatura d'asturianu nos impresos de matrícula" anomalía que la organización diz que ye "xeneralizada" nos cursos de bachilleratu. Otra de les anormalidaes ye que "en munchos de los pocos centros onde esiste la posibilidá de cursar l'asignatura nun se ta respetando l'horariu reglamentariu de dos hores selmanales, que queda reducíu a una hora" llegando a dase'l casu en dellos centros de qu'alumnos "qu'entamen el cursu el cursu cola asignatura d'asturianu disvíense forzosamente a otres optatives por decisión de la dirección de los centros".