Xunta Moza convoca una fuelga n’enseñanza media

La organización xuvenil Xunta Moza, que depende de la Xunta Pola Defensa de la Llingua Asturiana, entiende que la situación de la escolarización de la llingua asturiana ye tan preocupante que nun queda más remediu que plantegá-y un pulsu a l'alministración en forma de fuelga, que ta convocada pal próximu miércoles 10 de payares. Por de pronto, Xunta Moza lleva alantre sola la convocatoria, pero los responsables de la organización anuncien que tan en tratos con otros colectivos y organizaciones pa que s'amiesten a la llamada al paru.

Desque entamó'l cursu escolar, pue dicise que los casos de protestes particulares y colectives pola escolarización del asturianu nun apararon, y dellos vienen yá de vieyo. Ún de los más conocíos ye'l de Catuxa Bermeyu, alumna del IES Naranco d'Uviéu que l'añu pasáu nun tuvo derechu a recibir clas d'asturianu, empobinándola l'institutu a un grupu de francés al que la neña nun se presentó en tol cursu, suspendiendo l'asignatura. Agora Catuxa, que ta repitiendo cursu, tien qu'asistir amás por decisión del centru a un grupu d'educación especial.

Tres del casu de Catuxa, alumnos d'Institutos de toa Asturies ficieron público que nos sos centros nun disponíen de mayestru d'asturianu, ello con tener solicitada l'asignatura más estudiantes del mínimu d'ocho que se pide. L'IES de Ciañu (Llangréu), l'IES "Universidá Llaboral" de Xixón o l'IES Alfonso II d'Uviéu son trés d'estos casos. Xunta Moza, que recoyó delles d'estes denuncies, investigó por cuenta propia y descubrió que dellos institutos nin siquiera daben la opción d'asturianu nos sos cartafueyos de matriculación, lo que suponía un incumplimientu dafechu de la Llei d'usu del asturianu de 1998, qu'obliga a ufiertar l'asignatura ensin dexar opciones.

Les denuncies públiques de Xunta Moza, sindicatos d'enseñanza y colectivos d'alumnos dende qu'entamó'l cursu paez que nun repercutieron na Conseyería d'educación, y les declaraciones del Conseyeru d'Educación nes qu'afalaba a quien quixere matriculase n'asturianu a marchar pa otru centru del so conceyu onde se diere calecieron más l'ambiente. Iyán González, de Xunta Moza, reconoció que ye inasumible que dempués de tola retafila de denuncies y casos que se ficieron públicos entovía queden institutos "onde hai grupos de más de doce persones que nun se-yos pon mayestru d'asturianu" y llamenta que "la Conseyería arme un añu tres d'otru'l mesmu escándalu".