Xunta Moza califica de "ésitu dafechu" el seguimientu de la fuelga na enseñanza

La fuelga convocada pola Xunta Moza paraliza institutos per toa Asturies. Los IES de la Pola Siero, el de Llugones o el Pérez d'Ayala n'Uviéu pararon dafechu, y el paru rexistra una alta participación n'otros como'l de la Pola L.lena o l'Infiestu, onde s'estima la participación nel paru nun 90% según datos provisionales apurríos pola Xunta Moza

Representantes de Xunta Moza, organización convocante del paru, celebraron l'ésitu de la convocatoria, que calificaron de "ésitu". Según los datos de la Xunta, el siguimientu de la fuelga ye masivu, sobremanera nos cursos más avanzaos que se dan nos IES, rexistrándose únicamente una tasa mínima d'asistencia a clase nos cursos de 1º y 2º d'ESO, mientres que'l paru en bachilleratu ye poco menos que total. Ye'l casu del IES de Turón, onde nun hai naide en clase de Bachilleratu, y namás asistieron a clas13 rapacinos de 1º y 2º d'ESO.

Los responsables de Xunta Moza cuenten con que paren más aules a lo llargo de la xornada y felicítense pol ésitu de la iniciativa. Dende XM afírmase que "cualquier resultáu yera un ésitu, pero esto perpasa toles previsiones".

Sobre les declaraciones del Conseyeru d'Educación Iglesias Riopedre, qu'afirmó ayeri na viéspora de la fuelga nel actu de presentación del Plan de Formación Permanente del Profesoráu que l'añu qu'entra diba poder estudiase asturianu "en tolos cursos" dende Xunta Moza entienden que Riopedre ta "vendiendo fumu". Según la organización xuvenil de la Xunta Pola Defensa de la Llingua, la Conseyería d'educación tendría de concretar si amás de llegar "a tolos cursos" la ufierta d'asturianu va llegar "a tolos centros y a tolos estudiantes". Los responsables de Xunta Moza contactaos por Asturies.com denunciaron que la universalización de la enseñanza del asturianu "nun ta nes previsiones del gobiernu" y declararon que l'alministración educativa asturiana lleva años faltando a les sos promeses y incumpliendo la llei. En cuantes a la continuidá de les movilizaciones, Xunta Moza anunció que la fuelga de güei ye "un principiu y non un final" nuna campaña de reivindicación y protesta