La Xunta Eleutoral alza'l recursu d'Andecha Astur a la Central

El recursu d'Andecha Astur pola non impugnación de les eleiciones pol asuntu de los papeletes llega a la Xunta Eleutoral Central. Tamién ta en conocimientu del Ministeriu Fiscal.

La organización nacionalista considera qu'esta situación nueva supón "una reconocencia de lo xustificao de la nuesa denuncia", y magar les considera bien positives, manifiesta "la so esmolición pola estrema lentitú cola que se ta desendolcando tol procesu, darréu que tarrecemos que cuantu más tiempu pase dempués de les eleiciones, más difícil va resultar que se tomen les midíes recoyíes pola LLOREG pa estos casos y se proceda a la invalidación de les eleiciones n’Asturies". Andecha acusa tanto a la Xunta Eleutoral como a la de Zona de Xixón de nun tar "al altor de les circustancies, darréu que conociendo dafechu los fechos denunciaos por Andecha Astur, non solo nun actuaron d'oficiu de forma imediata, sinón qu'una vegada Andecha Astur presentó la impugnación de les eleiciones n’Asturies, nun actuaron col debíu interés y la necesaria prontitú, sinón que, especialmente no que se refier a la Xunta Eleutoral Provincial d’Asturies, intentaron desabrise del problema ensin dengún miramientu".

Pa completar los despropósitos, la Xunta Eleutoral Central obligó a la formación asturiana a tornar al castellanu'l recursu presentáu "aduciendo la consabida circunstancia predemocrática de que la llingua asturiana nun ye oficial". Pese tener les ferramientes llegales al so favor, Andecha decidió facer la torna "pa evitar lo que paecen ser maniobres dilatories que puedan dificultar l'oxetivu principal que ye'l respetu a lo dispuesto na LLOREG y consecuentemente la invalidación de les eleiciones del 24 M nel nuesu país". La impugnación de les Nacionales y Municipales por parte de la formación nacionalista vieno pola retirada de les sos papeletes, tanto en castellanu como n'asturianu, en polo menos un centenar de colexos eleutorales por tar en llingua asturiana pese a la validación de les mesmes por parte de la Xunta Eleutoral.