Xune Elipe participa cantando n’asturianu nel discu del venti aniversariu d’Habeas Corpus

Los madrilanos Habeas Corpus cumplen venti años y pa celebralo tán acabantes d’asoleyar un discu nel que collaboren 31 collacios de la banda. Xune Elipe participa con un testu n’asturianu nel cantar ‘La rabia y los sueños’.

Baxo’l nome de ’20 años de rabia. 20 años de sueños’, Habeas Corpus recopila 15 de los sos cantares más representativos, que reiterpreten con collaboraciones de nomes bien conocíos de la escena musical estatal, como César Strawberry (Def Con Dos), Fermín Muguruza (ex Kortatu y ex Negu Gorriak), Iñaki (Betagarri), Alex (Eina), Carlos Escobedo (Sôber), Juan (Soziedad Alkoholika), Brigi (Koma), Juankar (Boikot), Placi (Segismundo Toxicómano), Kutxi (Marea), Feo (El Último Ke Zierre), Fernando Madina (Reincidentes), Sho Hai (Doble V) y Nega y Toni (Los Chikos del Maíz), ente otros, hasta sumar 31. 15 temes reivindicativos que sirven de repás a tola trayeutoria d’una banda mui venceyada a Asturies poles sos visites múltiples al país y a l’amistá que caltién colos integrantes d’Escuela de Odio. Inclusive, dambos grupos editaron un LP en vinilu de nome ‘A dolor’.

El toque asturianu n’esti discu dalu Xune Elipe, cantante de Dixebra, qu’incorpora un testu nuevu na llingua del país nel cantar ‘La rabia y los sueños’, nel que tamién collabora Óscar, de Lujuria. Esti tema ta incluyíu nel discu ‘Otra vuelta de tuerca’ (2002) y nesta versión endurez el so soníu, dando una presencia mayor a les guitarres.