Xune Elipe fai un llamáu a la unidá na manifestación del día 5 de marzu

La manifestación qu'entama'l Conceyu Abiertu Pola oficialidá presentóse oficialmente ayeri nun actu que se celebró nel auditoriu Príncipe Felipe d'Uviéu y nel que se fizo un llamáu a la unidá del asturianismu pa esi día

Xune Elipe, cantante del grupu "Dixebra", el responsable de Radio Sele Xuanxo Mariño y el representante de la Xunta Pola Defensa de la Llingua Xulio Casado concueyaron nos sos respectivos discursos na necesidá de superar les diferencies ente les distintes sensibilidaes del asturianismu col oxetu de dar una imaxe unitaria'l día de la manifestación alredor de la reivindicación de la oficialidá na reforma del estatutu. El cantante de "Dixebra" foi'l qu'espresó esta idea de manera más clara al pidir "que nos axuntemos por dos hores que ye lo que dura la manifestación" escaeciendo diferiencies.

Xulio Casado, de la Xunta Pola Defensa de la llingua, sorrayó esi deséu d'unidá y esplicó que la gran virtú del Conceyu Abiertu Pola Oficialidá ye precisamente la de "tender pontes ente distintes organizaciones ensin escaecer la importancia de la movilización reivindicativa", llamando l'atención sobre la importancia de movilizar "a miles de persones" el prósimu día 5 nuna movilización que naide tien que patrimonializar. Ello va ser asina que'l "baberu" de la manifestación van llevalu artistes y persones populares non venceyaes a grupos políticos nun intentu por dar imaxe de pluralidá.

D'otra manera, Casado denunció el "apartheid" llingüísticu qu'entiende que se vive n'Asturies y que s'espeyó ayeri na negativa de la Delegación del Gobiernu a aceptar a trámite la solicitú del CAO pa la manifestación del día 5, refugándola por tar redactada n'asturianu.

Énte situaciones como esta Xulio Casado llamó a facer efectivos los derechos de los falantes d'asturianu y a que dexe de presentase los avances na materia como una serie de concesiones.

Pela so parte, Xuanxo Mariño faló tamién de la importancia de la unidá na convocatoria del día 5, apuntando a que'l problema pal reconocimientu del asturianu "ta na clase política y non na población asturiana", lo que fai preciso "que'l día 5 los políticos vean que tamos equí". P'acabar, Mariño espresó'l so deséu de qu'esta manifestación pola oficialidá "sea la última"