Día del Llibru Asturianu

Xube'l paru y baxa l'emplegu nel tercer trimeste del añu

|
Xube'l paru y baxa l'emplegu nel tercer trimeste del añu

Según la EPA, el númberu de paraos aumenta n'Asturies nel tercer trimestre respectu al anterior en 1.800 persones, un 3,02%, hasta contabilizar 61.300. Pela so parte, la ocupación amenorga en 300, un 0,07%, hasta un total de 394.400 trabayadores.

Si se comparen estos datos colos del tercer trimestre de 2017, el paru aumenta un 3,56% (2.100 persones) y l'ocupación baxa un 0,88% (3.500 persones).

La tasa de paru del Principáu caltiense per debaxo de la media nacional, según reflexa la Encuesta de Población Activa (EPA) del tercer trimestre. En concreto, el porcentaxe asítiase n'Asturies nel 13,45%, frente al 14,55% del conxuntu del país.

La directora del Serviciu Públicu d'Empléu del Principáu (Sepepa), Luisa Pérez, almite que les cifres globales de la última EPA “nun resulten favorables p’Asturies”, anque recuerda que ye conveniente esperar a finales d'añu para comparar medies añales, yá qu’en comunidaes pequeñes “los tamaños de les muestres son bastante llindaos y provoquen notables oscilaciones ente los distintos trimestres”.

Amás, espresa'l so enfotu en que les polítiques d'empléu qu'impulsa'l Gobiernu d'Asturies ayuden a ameyorar los datos. Nesti sentíu, destaca l'apueste del Executivu autonómicu pola formación pal empléu, una iniciativa que permite dotar d'habilidaes a les persones que demanden un puestu de trabayu y aumentar tamién la competitividá de les empreses rexonales por aciu la so contratación.

N'España, el desempléu menguó un 4,7% y l'empléu creció un 0,95% en comparanza col segundu trimestre d'esti añu. Les cifres interañales amuesen un aumentu de la ocupación del 2,51% y un descensu del paru del 10,87%.

Contador Estadistiques