Xube’l 8% preciu de la vivienda usao n’Asturies

Según datos espublizaos pola empresa Tasaciones Inmobiliarias (Tinsa) el preciu de la vivienda de segunda mano n'Asturies medró un 8% l'añu pasáu. Esto supón una moderación de los precios n'Asturies énte la desaceleración de la esaxerada xuba de precios nel mercáu inmobiliariu. Dientro del mercáu de viviendes de segunda mano, Asturies foi xunta Galicia, de les Comunidaes Autónomes onde menos medró'l preciu de la vivienda usao. A la contra, Madrid, que tuvo una xuba nel preciu penriba'l 19%, ye'l llugar onde más caro ye mercar una vivienda de segunda mano. De fechu'l preciu mediu de la vivienda vieya en Madrid asítiase sobre los 2.368 euros el metru cuadráu. Otramiente, nel mercáu de vivienda de construcción nuevo, la xuba media nel Estáu Español foi nel 2003 del 18,5% y n'Asturies del 16,42%. El preciu mediu de la vivienda asturiana ye de 1.158 euros el metru cuadráu.

Nel añu 2003 entamóse la construcción de 700.000 nueves viviendes en tol Estáu. Con too y con ello, la xeneración del "baby boom" y los inmigrantes van siguir tirando del sector de la construcción según les previsiones de les inmobiliaries. Anque dende'l sector constructor esperen que nesti añu 2004 la demanda de vivienda se modere nun descarten una xuba nos precios penriba'l 10%.