Xuan Xosé Sánchez Vicente estrénase na novela en castellanu

"No miréis al mar" ye la primer novela en castellanu de Xuan Xosé Sánchez Vicente, conocíu escritor en llingua asturiana y antiguu parlamentariu de la Xunta Xeneral pol Partíu Asturianista. La obra va presentase'l próximu día 11 d'avientu a les 8 de la tarde nel Antiguu Institutu de Xixón cola participación del autor y del periodista Fernando Canellada.

Asoleyada pola casa Septem Ediciones, "No mireis al mar" presenta una trama doble con dos protagonistes. El primeru ye un empresariu informáticu asturianu que tien d'abrir una sucursal de la so empresa en Madrid, mientres que'l segundu ye un superviviente de la Guerra Civil que ve evolucionar l'Asturies del franquismu, dende los años de la represión más dura y de la necesidá hasta la construcción d'Ensidesa n'Avilés. Ente dambos personaxes, la novela va faciendo un complicáu xuegu de pasion, poder y corrupción que s'espurre peles dos époques qu'abarca'l relatu.