Xuan Porta evoluciona favorablemente

L'escritor y biólogu Xuan Porta ta saliendo alantre de les mancadures que sufrió nun accidente mientres paseaba pelos Picos d'Europa y del estáu de deshidratación que presentaba tres de los cinco díes en que tuvo desapaecíu. Los médicos a cargu del accidentáu y los sos familiares y allegaos son optimistes sobre la so recuperación

Xuan Porta tien francíes la rótula y el todiyu de la pierna izquierda amás de la clavícula del mesmu llau y sufrió un fuerte traumatismu craneoencefálicu, teniendo qu'operalu los médicos del Hospital Central d'Asturies d'un cuayu de sangre na cabeza. Paradóxicamente, la falta d'agua en cuerpu llibró al accidentáu de males mayores, en cuantes qu'ello torgó que criare más cuayu.

Anque Porta taba consciente nel intre d'alcontralu los servicios de rescate, los médicos decidieron dormilu pa poder operalu y p'ayudar a la recuperación. Según familiares y allegaos al biólogu, la operación nun tuvo nenguna complicación y Xuan Porta esconsoñó esti martes del efectu de la medicación.

Los médicos al cargu de Xuan Porta sorrayaron que, al poco de recuperar el conocimientu, l'accidentáu yá yera a identificar a les persones que tenía delantre y entrugaba por acontecimientos de recién y proyectos que contaba con facer estos díes, lo que ye mui bona señal sobre la so recuperación. Juan José Porta, padre de Xuan Porta, señaló que contaben con que pa la selmana qu'entra Xuan pudiere abandonar la UCI y pasar a planta.