Xosé Lluis García Arias pidió un meyor nivel d'escritura n'apertura del conceyu de l'ALLA

La situación actual de la lliteratura en llingua asturiana sométese a estudiu dende ayeri nel II Conceyu Internacional de Lliteratura qu'organiza l'Academia de la Llingua Asturiana. Les xornaes, qu'aconceyen a un centenar de persones, van tratar la relación ente la lliteratura n'asturianu y la música, la emigración y la llingua y la relación de la lliteratura n'asturianu col restu de lliteratures hispániques, ente otros aspectos.

La rellación de la lliteratura n'asturianu cola emigración a América va tar mui presente, con intervenciones de filólogos y estudiosos del tema veníos dende aquel continente. Dalgunos d'ellos van ser Marcela Romana, de la Univeersidá Nacional de Mar del Plata, n'Arxentina, que va falar sobre'l cantar d'autor asturianu; Jorge Domingo Cuadriello, del Institutu de Lliteratura y Llingüística de L'Habana, que va falar sobre la lliteratura asturiana en Cuba; y Andrés Villagrá, de la Universidá Pace de Nueva York, que va comentar la presencia de la lliteratura asturiana na emigración. Estes van ser dalgunes de les más de 30 conferencies y ponencies que van tener llugar nel salón d'actos del campus del Milán, de la Universidá d'Uviéu, nel que tán teniendo llugar estes xornaes d'equí al xueves.

La presidenta de l'Academia de la Llingua Asturiana, Ana Cano, y la directora xeneral Promoción Cultural y Política Llingüística, Consuelo Vega, inauguraron estes conferencies. La primera mostró'l so deséu de que la presencia de la segunda seya "un signu d'una bona rellación ente'l Principáu y l'Academia, y nesti sentíu, espresó'l so enfotu de cara al mandatu qu'acaba d'entamar".


A continuación abrió'l ciclu de conferencies el profesor Xosé Lluis García Arias, qu'ofreció dalgunes idees pa meyorar el nivel y el rigor de la lliteratura asturiana, pues, dende'l so puntu de vista, "güei hai dalgunes persones qu'escriben según-yos vien a la tiesta". Nesti sentíu, apostó por un mayor rigor na escritura, al traviés del refuerzu del léxicu y la gramática.