Xosé Antón Suárez Puente, el segundu académicu de 2016

Güei, l'Academia de la Llingua Asturiana dio a conocer que Xosé Antón Suárez Puente (Uviéu,1971) va ser tamién nomáu académicu el próximu 6 de mayu.

El viernes pasáu, Pablo Suárez García comentaba nes redes sociales que l'Academia de la Llingua Asturiana taba acabante comunica-y la so decisión de nomalu académicu en 2016, y esta mañana l'ALLA confirma esti nomamientu al empar qu'informa d'un segundu nomamientu.

García Puente ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín.

Suárez Puente emplega davezu l’asturianu en conferencies y seminarios de divulgación de los avances científicos del IUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet.

Ye collaborador de l'Academia de la Llingua Asturiana y miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y l'Academia, onde tien asoleyaos dellos artículos.