Xosé Nel Riesgo, direutor nuevu de la Fundación Municipal de Cultura, Educación y UP de Xixón

L’escritor avilesín Xosé Nel Riesgo ye dende esti martes el direutor nuevu de la Fundación Municipal de Cultura, Educación y Universidá Popular de Xixón. La Xunta de Gobiernu escoyó a Riesgo ente dellos candidatos.
 
Llicenciáu en Xeografía pola Universidá d’Uviéu, con un máster en Desarrollu Llocal, l’autor de noveles como ‘El cai nunca duerme’ o ‘Escrito na ceniza’ entama agora una etapa nueva al frente de la xixonesa Fundación Municipal de Cultura presidida por Carlos Rubiera, conceyal de Cultura. Riesgo, pioneru en cultivar la lliteratura negro nel nuesu idioma, ye tamién ún de los fundadores de l’Asociación Cultural L’Arribada y miembru de la Fundación Belenos y del conseyu editorial de la revista ‘Asturies, memoria encesa d’un país’.
 
Amás del nomamientu de Riesgo, la Xunta de Gobiernu d’ayeri tamién aprobó un conveniu de collaboración col Teatru Xovellanos por importe de 95.000 euros pa la contratación de 35 trabayadores y la propuesta de contratación d’Alprinsa pa la ellaboración y distribución d’almuerzos y xintes pa les escueles d’Infantil y Primaria pa los cursos escolares 2011-2012 y 2012-2013 –con opción de prórroga per dos años más– por un valor de 7.238.451 euros.