Xornaes de lliteratura asturiana

Güei entamen en Centru de Cultura Antiguu Institutu de Xixón les IV Xornaes de Lliteratura Asturiana, una cita cultural que llevaba 10 años ensin celebrase y qu'agora vuelve pa "lleer el futuru" de la lliteratura n'asturianu, como diz el títulu de les xornaes. La primer ponencia, entitulada "La lliteratura asturiana diez años dempués" va dala a les 7 y media de la tarde l'escritor José Luis Piquero, autor que tien publicaes n' asturianu les traducciones de l'antoloxía "Cincuenta poemes ingleses del sieglu XX" y de "La
gata nel teyáu de zinc caliente" de Tennessee Williams. En castellanu, Piquero tien
publicaos tres llibros de poemes o "Las ruinas" (1989) "El buen
discípulo" (1992) y "Monstruos perfectos"(1997), obra que foi
finalista del Premiu de la Crítica, anque'l públicu conózlu más pol so llabor de periodista al frente de la estaya de
cultura del selmanariu Les
Noticies. Tres de la ponencia va haber una mesa redonda cola participación de los escritores Vicente
García Oliva, Humberto González, Pablo Antón
Marín Estrada y Xuan Xosé Sánchez Vicente.

Les IV Xornaes, organizaes pola Fundación Municipal de Cultura del Ayuntamientu de Xixón, incluyen conferencies sobre la lliteratura asturiana y la so proyección tolos martes y xueves d'equí al día 20, siendo una de les que más llamen l'atención sobre'l papel la que va poner el día 18 l'escritor vascu Unai Elorriaga, premiu Nacional de Narrativa . El programa complétase coles ponencies "Lliteratura y Comunicación" a cargu del periodista Próspero Morán
(11 de payares) ¿Una lliteratura ensin llectores?" con Xilberto Llano (13 de payares) y "El futuru yá ta equí" na que la periodista Beatriz R. Viado va presentar a los escritores más mozos en llingua asturiana.