Xornada electoral na Universidá

La xornada electoral na Universidá d'Uviéu ta desarrollándose con una participación mui alta. A la una de la tarde, la participación yera del 14,18% del total del censu, participación que se reparte por estamentos universitarios. Nel casu de los profesores doctores, pasaron peles urnes el 51,42%, anque'l Personal d'Alministración y Servicios ye'l que rexistra una participación más alta, col 53,90% del censu, porcentaxe que baxa al 31,23% del censu nel casu del restu de personal investigador y docente. Ente los alumnos, la participación ye escepcionalmente alta, y a la 1 de la tarde pasaren a echar la papeleta'l 10,62% de los estudiantes de la Universidá, rexistrándose na facultá de Mines un porcentaxe del 23% de participación del alumnáu y en Medicina del 21%. A les 7 piesllen les urnes y, según dio anuncia'l rector Juan Vázquez, sobre les 9 sabránse los resultaos d'esta primer elección abierta a rector de la Universidá'Uviéu.

D'otra manera, el debate sobre l'asturianu marcó'l día de reflexón. La negativa de Juan Vázquez a firmar el decálogu sobre normalización del asturianu que-y propunxere la Xunta Moza y que sí firmó Vicente Gotor xeneró una rempuesta casi automática, y a la mañana dempués los campus apaecíen estraos de carteles ensin firma nos que s'acusaba al rector de mentir nesta cuestión. Darréu d'ello, colectivos al favor de la candidatura de Juan Vázquez pegaben otros cartelos de signu distintu pero tamién escritos n'asturianu nos que s'atacaba a la campaña de "la Pita" cola frase "cola Universidá nun se xuega, les pites pal corral".