Xixón ye yé-yé

Entama güei en Xixón l'Euro Yé-Yé 2005, el festival dedicáu a la escena mod-sixty y ye-yé más importante d'España y ún de los más importantes d'Europa, con un intensu programa d'actuaciones musicales, cine, esposiciones y hasta un pase de modelos inspiraos na estéica de los 60 obra de la diseñadora asturiana Nuria Onis.

La parte musical del festival cuenta cola participación de grupos españoles como Mega Purple Sex Toy Kit, qu'estrenen güei el festival na sala Bola Ocho de Cimavilla, anque'l nome más conocíu pal gran públicu llega mañana xueves 4 d'agostu cola actuación de los míticos Yardbirds, que lo van facer de baldre na Plaza l'Ayuntamientu. El vienres ye'l turnu de The Gonks y Modus, mientres que'l sábadu toquen The Link Quartet, echando'l piesllu al festival el domingu un cartel doble con Speaklow y The Nederbietels. Toles nueches va haber "allnighters" sesiones de pinchadiscos que van durar hasta altes hores de la madrugada y la tradicional "scooter cruzada" que va estrar les cais de la ciudá de motos clásiques de les marques Vespa y Lammbretta. L'abonu pa tolos díes cuesta 45 euros, anque tamién se venden entraes sueltes pa cada día. Tolos precios, horarios y actividaes complementaries puen consultase na web del festival.