Xixón yá tien redactaes les ordenances d’usu del asturianu

María Xosé Rodríguez, responsable de la Oficina de la Llingua de Xixón, adelantó a Asturies.com que les ordenances d'usu de la llingua asturiana pal conceyu de Xixón yá tan redactaes y presentáu'l documentu definitivu a los grupos políticos con representación nel conceyu, anque'l debate en Xunta de Gobiernu entovía nun tien fecha.

Dende qu'echare a andar el 20 de xineru del 2004, ún de los oxetivos declaraos de la oficina yera'l de redactar y presentar al Conceyu unes ordenances d'usu del asturianu, anque yá na mesma presentación se dixo que sedría preciso esperar a un momentu de tranquilidá na vida política del conceyu, que d'aquella andaba revuelta pola aprobación del Plan d'ordenación Urbana y otros asuntos polémicos.

La redacción del plan, cola ayuda del Conseyu Asesor, espurriose hasta ocupar bona parte del branu, pero lo que yá nun se sabe ye hasta cuando va retrasase'l debate políticu sobre'l documentu de les ordenances, que tolos grupos políticos tienen yá dende mediaos de setiembre. La prósima selmana ta prevista una xunta del Conseyu Asesor de la Oficina na que la conceyala encargada de la estaya de llingua, Carmen Rúa, pue que faiga dalgún adelantu sobre la cuestión.