Xixón y Uviéu acueyen les concentraciones pol Primeru Mayu

La situación sanitaria obliga a controlar aforos y a caltener les midíes de seguranza.

Mañana celébrase'l Primeru Mayu y, como ye vezu, los trabayadores salen a la cai a movilizase en defensa de los sos derechos. Los nomaos sindicatos mayoritarios, CC OO y UXT, van concentrase al meudía na Plaza Mayor de Xixón baxo'l lema 'Ahora toca cumplir', eventu que se va tresmitir en direuto pela rede.

A unos pocos metros, n'El Náutico, van aconceyar el Sindicatu Unitariu Autónomu de los Trabayadores de la Enseñanza d'Asturies (SUATEA) y CGT reivindicando que 'Güei más que nunca, Primeru Mayu'. Nesta ocasión la Corriente Sindical d'Izquierda (CSI) entama actu en solitariu, a les 11.30 hores, frente a la Sindical apuntando que 'La clas trabayadora sostién el mundu y namás la clas trabayadora organizada pue camudalu".

Mentes, Uviéu ye la ciudá escoyida por USO pa la so concentración. Va ser al meudía na plaza d'España baxo'l lema 'Haz uso de tus derechos'.