Xixón y Uviéu acueyen actividaes infantiles n'asturianu

Na 'Semana Negra' preséntase'l llibru 'Unes vacaciones bien rares' y los cantares de 'Kikirikikí' lleguen a Enclave Pop.

Esti miércoles de branu va contar con actividaes infantiles en llingua asturiana en Xixón y Uviéu. Dos propuestes d'accesu llibre pa disfrutar de les vacaciones.

La 'Carpa de la Palabra' del certame xixonés acueye la presentación del llibru 'Unes vacaciones bien rares' (Ediciones Trabe), obra d'Esther Prieto con ilustraciones de Nanu González. L'actu va ser a les 18 hores y nél los presentes van poder conocer sobre esta historia que ye un cantu a la fauna salvaxe y al so derechu a vivir onde siempre vivió, centrada nos llobos.

Mentes, n'Uviéu, Alicia Álvarez va inaugurar a les 19 hores Enclave Pop, iniciativa de la Fundación Municipal de Cultura d'Uviéu que pretender dar visibilidá a músicos asturianos con conciertos programaos los miércoles y xueves de lo que queda de mes y d'agostu. La xixonesa, en compañía de David Varela, va interpretar los cantares del so discu-llibru 'Kikirikikí' na plaza Porlier.