Xixón y Avilés van tener gobiernos de coalición PSOE- IX-BA-LV

Anque nun hebo alcuerdu pa llegar a un gobiernu asturianu conxuntu, socialistes y IX-BA-LV llegaron a pautos de gobiernu yá ratificaos y aprobaos pa gobernar los conceyos de Xixón y Avilés conxuntamente.

Asina, el Conseyu Políticu d'IX-BA-LV aprobó ayeri siguir col el pautu de Gobiernu local n'Avilés, onde Fernando Díaz Rañón, va ser responsable de Vivienda y Purificación García Villadonga de Servicios Sociales.

Tocante a Xixón, Jesús Montes Estrada va llevar les polítiques de Cooperación, Cultura Tradicional y Política llingüística. Como parte d'estes atribuciones, Montes Estrada va llevar la presidencia del Presidencia del Conseyu Asesor de la Llingua, que'l pautu de gobiernu se compromete a crear formalmente -l'anterior dimitiere en pleno- y a "ellaborar un plan d'usos y unes ordenances acordies con la normativa vixente". L'otru conceyal d'IX, Francisco Santianes, va llevar la conceyalía de Vivienda y la del Distritu Sur, presidiendo la empresa municipal de vivienda.