Xixón tien el peor aire d'Asturies

La organización Ecoloxistes n'Acción d'Asturies denunció esta selmana que los índices de contaminación atmosférica nel centru d'Asturies siguen mui penriba de los topes que manda la llei.

En Mieres, la térmica de La Pereda, preparada pa combustibles de toa triba y onde quemen mayormente los restos de les escombreres mineres, tien muncho que ver cola superación, trés veces nel añu, de los másimos permitíos pal Diósidu d'azufre y delles más los l'ósidu de nitróxenu, mientres que la contaminación por partícules pasó del tope más de 50 vegaes acordies Ecoloxistes n'acción destaca que, cola normativa nueva qu'entra pal 2.005, estos valores nun podríen dase de pasu. Valores asemeyaos presenten los puestos de control de Llangréu, onde s'incumple la normativa en SO2 y partícules nel control de Turiellos. Valores asemeyaos danse n'Uviéu, onde destaca que'l control del palaciu de Deportes llegó a marcar 843 g/m3 de diósidu d'azufre, cuando l'alerta ta en 500 g/m3.

Allegándonos pa la costa, Avilés, en tiempos una de les ciudaes más contaminaes d'Europa, tien un problema grave de presencia de partícules (categoría qu'enxerta povisaen suspensión y demás partícules sueltes procedentes del tráficu de coches) mientres que l'azufre tamién entra dacuando en niveles de peligru.

Con too y con ello, lo más grave ye lo de Xixón, onde la estación d'el pantanu pasó dos vegaes de la tasa de 500 g/m3 d'azufre en plazos de más de tres hores, polo que tendría de declarase una "alerta atmosférica". Según los datos que remana la organización ecoloxista, la concentración de contaminantes ye enforma grave nes parroquies de Xove, Tremañes y Montiana, les tres na rodiada de la fábrica d'Arcelor de Xixón y de la térmica d'Aboño, siendo la parroquia de San Andrés, al llau d'Aceralia, la que tien el peor aire d'Asturies.