Xixón pide más compromisu de les autoridaes col asturianu

El sociólogu Francisco Llera Ramo presentó esta mañana en Xixón los datos del Estudiu Sociollingüísticu de Xixón, el primeru que se fai específicu pa un conceyu y qu'aporta importantes datos pal diagnósticu de la situación del asturianu. Nel actu tuvieron la conceyala encargada de llingua asturiana Carmen Rúa (IX-BPA) y la popular Pilar Fernández Pardo, que formuló delles cuestiones al responsable del estudiu, pero nun asistieron conceyales del grupu socialista.

Xixón yá tien un estudiu sociollingüísticu propiu, ún de los oxetivos que se plantegaba pa esti añu la oficina de la llingua municipal que dirixe María Xosé Rodríguez pa tener un preséu d'analís de la realidá del conceyu y les demandes más inmediates de la ciudadanía en materia de normalización. L'encargáu de facer l'estudiu foi l'equipu del Euskobarómetro, col sociólogu asturianu Francisco Llera Ramo al frente.

Según esplicó Llera Ramo, los datos del estudiu concretu pa Xixón nun se separten demasiao de los que dio la encuesta xeneral d'Asturies, anque evidentemente, hai delles particularidaes propies d'un conceyu que, amás de ser el más grande d'Asturies por población, ye tamién ún de los que tienen una estructura más complicada, amestando xente de toles procedencies.

Sobre más de 600 entrevistes espardíes per too Xixón, l'equipu de Llera Ramo descubrió que la ciudá de Xixón tien una población mayormente de centru-izquierda en cuantes a lo político y con un fuerte sentimientu asturianista (6,7 nuna escala de 10). Por procedencies, namás son nacíos en Xixón un 45% de los encuestaos, esistiendo un porcentaxe del 19% de xente que nació fuera d'Asturies.

Sobre esti panorama social, hai una gran mayoría que reconoz l'asturianu como llingua propia d'Asturies. Los más de los encuestaos tamién ven qu'asturianu y castellanu son llingües diferenciaes. Sicasí, y anque un 53% de xixoneses tuvieron l'asturianu como llingua materna, a la hora de falar na llingua la ciudá ta perbaxo de la media d'Asturies, y solo un 40% reconocen que lo empleguen, ello con tener un 82% de falantes pasivos qu'entienden cuando se-yos fala n'asturianu. Los más de los xixoneses tiren del castellanu pa espresase en contestos sociales que salgan fuera del círculu d'amigos y familiares. Nel capítulu de les voluntaes y intenciones, el 49% dicen que-yos prestaría recibir clas d'asturianu y un 62% tan a favor de que s'alfabetice a los sos fíos en llingua.

Delles particularidaes del estudiu ayuden a facer la "postal" de cómo se ven los xixoneses. Asina, el 51% dicen que falen más asturianu que los d'Uviéu, pero menos que los de les cuenques. Cimavilla y La Calzada salen nel retratu como los barrios onde más se fala y L'Arena y Viesques como los que menos.

Sobre la política llingüística del conceyu y d'Asturies, la encuesta local de Xixón repite los datos de la xeneral. Ello ye, el 75% de los xixoneses dicen que les instituciones nun faen abondo pola recuperación del idioma, y les campañes de promoción que se faen resulten "invisibles" énte la población, tanto que namás un 15% de los encuestaos conocen de la esistencia de la Oficina de la Llingua. Un 68% piden una actuación más valiente por parte de les instituciones y un 49% incluso reclamen qu'haya funcionarios capacitaos n'asturianu nel Ayuntamientu. Un 57% dicen que-yos prestaría sentir a l'alcaldesa y otros representantes públicos falar n'asturianu anque ello namás fuere ocasionalmente, y hai un sentir mayoritariu al favor de que publicaciones como La Gaceta del Ayuntamientu enxerten más artículos n'asturianu. Mayoritaria tamién (71%) ye la petición de qu'acontecimientos importantes de la ciudá, casu del Festival de Cine y otros, s'anuncien n'asturianu, una demanda que'l 48% faen estensiva a ún de los símbolos de la ciudá, el Sporting.