Xixón nun se mueya pol Arango

El plazu de dos meses que-yos diere'l conceyu de Xixón a los
responsables de la plataforma "Cultura pal Arango" pa redactar
un proyectu de viabilidá pa la sala ta a puntu d'acabar, y ún de
los globos sonda llanzaos pola consultora de Roberto Berciano, encargada de
facer el plan de viabilidá, nun tien traza de consiguir un bon
resultáu. Tratábase de que los ciudadanos interesaos en caltener
el teatru rellenaren una ficha na que se comprometíen a facer una
aportación económica a cambiu de tener accesu a los futuros
espectáculos a desarrollar nel teatru.



Boni Ortiz, representante de la plataforma, que la selmana qu'entra va
facer públicu'l proyectu de viabilidá del teatru, esplicó
a Asturies.com que, anque l'oxetivu yera atropar miles de firmes, namás
tenemos unos pocos cientos, colo que nun llegamos nin de lloñe al
oxetivu. Boni llamenta "que la sociedá civil nun respuenda,
anque ello tampoco nun ye d'estrañar nun mundu tan
individualista" y diz que'l verdaderu problema ta en que, anque
esisten munches fórmules p'afitar la viabilidá del teatru, lo que
falta ye voluntá política pa sacar alantre un proyectu que faiga
del Arango un espaciu pa la cultura, un espaciu que pa Boni ye
"necesariu, ente otres coses, pa que tolos grupos teatrales y musicales
de la ciudá, que pasen el veranu actuando fuera, tengan onde poder
trabayar pel iviernu"



De momentu, la plataforma, que la selmana qu'entra va dar a conocer
tolos términos del Plan de Viabilidá redactáu por
Berciano, sí adelanta qu'una de les soluciones alternatives que proponen
ye la de compartir l'Arango con Corporación Dermoestética. Ello
sedría posible gracies a la partición del edificiu en dos pisos.
El d'arriba, con unos 1.000 metros cuadraos, sedría pa la
clínica, mientres que la planta baxa sedría pa un nuevu Teatru
Arango, que quedaría ensin entesuelu pero caltendría los palcos.
El presupuestu necesariu pa remocicar l'edificiu calcúlase en dalgo
menos de dos millones d'euros, una cantidá que pa Boni Ortiz ye
"poco relevante pa los recursos colos que cuenta la ciudá a
cambiu d'un proyectu interesante dende'l puntu de vista cultural" pero
amás esiste un problema deriváu de la ficha de protección
patrimonial del edificiu, que torga'l poder francer l'interior en dos plantes.
Boni Ortiz esplicó que ta falándose con responsables
políticos del Principáu pa ver posibles igües pero
quéxase de que patrimoniu ponga tantes trabes nel casu del Arango
"cuando'l proyectu preve caltener l'usu del edificiu, cosa que nun
pasó n'otros cines y teatros emblemáticos de Xixón, como
nel Cine Hernán Cortés, onde tan faciéndose cuatro plantes
per dientro pa convertilu nun casinu o nel Cine Robledo, que se
convertió nun edificiu d'oficines". D'otra manera, la
partición del Arango sedría positiva pa los dueños del
inmueble, qu'anguaño cobren 7.200 euros pol alquiler del edificiu
qu'asina podríen cobrar alquiler a dos inquilinos por más
metros.