Xixón manifiéstase pol Teatru Arango

Una manifestación va recorrer esta tarde'l centru de Xixón en demanda d'un usu cultural pal teatru Arango, que podría convertise d'equí a la vuelta de bien poco nuna clínica d'estética.

La manifestación, convocada pola Plataforma Ciudadana Cultura pal Arango, cuenta col sofitu de bien d'asociaciones culturales, grupos de teatru y música, asociaciones vecinales y colectivos d'artistes de la ciudá, partíos políticos y sindicatos que quieren con esti xestu forzar a que'l conceyu llegue a un alcuerdu colos propietarios del edificiu pa que'l teatru caltenga un usu públicu con conteníos culturales. La marcha de protesta va salir a les siete de la tarde de la puerta del teatru para rematar delantre de la casa conceyu de Xixón.

La Plataforma "Cultura pal Arango" pretende que se-y dea un usu cultural al últimu de los grandes cines del centru de la Villa de Xovellanos, qu'hasta primeros de los 90 entovía contaba con una bona riestra de cines y teatros históricos. Pa facer alcordanza d'ellos, la plataforma "Cultura pal Arango" organizó anteayeri un paséu guiáu pol historiador Héctor Blanco. Con puntu de partida nel antiguu Cine Maria Cristina de la Cai Corrida, el paséu pelos cines y teatros que la piqueta llevó per delantre enseñó a los participantes lo que queda de cines como'l Robledo, qu'atecha un McDonalds y delles oficines, o l'Hernán Cortés, que ta n'obra p'abellugar el Casinu d'Asturies, y los edificios qu'anguaño ocupen los solares del antiguu Goya -agora Hotel Begoña- o l'edificiu d'oficines que sonsaña na so fachada la del antiguu Cine María Cristina nun intentu de respetar la orixinal, catalogada como patrimoniu, sin ser a ello, cosa que-yos valió una multa a los promotores de la obra nueva allá pel añu 1993.