Xixón, escenariu de los actos asturianos nel día del Arguyu Gai

El colectivu asturianu de gais y lesbianes celebra güei el Día Internacional del Arguyu Gai. Un actu institucional y una manifestación son les actividaes principales organizaes pa esti día pol colectivu Xente Gai Astur (XEGA).

L'aprebación de la llei nueva que va consentir col matrimoniu ente persones del mesmu sexu, y que yá namás ta pendiente de pasar trámite en Congresu de los diputaos da-y especial significación esti día que vien marcáu pola protesta de sectores conservadores y estamentos de la Ilesia opuestos a la llegalización del matrimoniu ente homosexuales. Preba de la trescendencia política de los actos de güei ye que la Federación Socialista Asturiana dio anuncia ayeri de que diba participar nos actos d'esta tarde.

Los actos previstos entamen a les 20.00 hores con un actu institucional nel Centru de Cultura Antiguu Institutu de Xixón nel que va haber intervenciones de representantes de dellos ámbetos sociales y nel que tamién va facese entrega de los premios positivu y negativu "tríángulu Rosa" y "Ladrillu Rosa". Los primeros van llevalos IX-BA y PSOE, les fuerces polítiques con implantación n'Asturies y con representación en parlamentu español que ficieron llabor en defensa de los derechos de gais y lesbianes, mientres qu'el premiu negativu va pa los diputaos y senadores asturianos del PP Pa n'acabando l'actu, ta convocada una manifestación que va salir a les 21.00 de la Plaza'l Parchís y que va rematar nel Paséu de Begoña, onde va lleese un manifiestu sobre la homofobia y lasdiscriminación social de gais y lesbianes, que XEGA califica de "lacra social" y que quier denunciar como nesti tiempu entovía se caltién, ello con esistir derechos llegales reconocíos pa esti colectivu.
Más información na web de XEGA