Xixón entama una campaña de normalización del asturianu nel comerciu

Ana Menéndez, presidenta de la Unión de Comerciantesde Xixón, asistió esta mañana a la presentación de la campaña pa la normalización del asturianu nel pequeñu comeciu de la ciudá qu'entama la Oficina de la llingua de Xixón. Al actu asistieron el director de la Oficina de Política Llingüística Ramón d'Andrés, el conceyal de Promoción Económica del Conceyu de Xixón José María Pérez y la conceyala encargada de cuestiones de llingua asturiana Carmen Rua.

La conceyala d'Izquierda Xunida -Bloque por Asturies foi la encargada de presentar los materiales d'esta campaña que quier afalar a comerciantes y veceros al usu del asturianu nel ámbitu del comerciu y que consisten en tripticos con vocabularios específicos n'asturianu de los productos que se despachen en cada estaya del comerciu, pegatines pa regalu con frases dedicatories n'asturianu, tarxetes con prontuarios de frases feches pa dependientes y bolses con eslóganes de comerciu n'asturianu. Amás d'estos materiales ta tamién en previsión el repartu nun futuru de señalética pa comercios con nomes n'asturianu, sobremanera pensando n'establecimientos d'alimentación, lo mesmo qu'esiste la idea de qu'esta campaña, que tuvo un presupuestu de 9.000 euros, s'esporte a otros conceyos d'Asturies, entamando pelos que disponen de servicios de normalización llingüística propios que s'encargaríen d'adaptar y xestionar la base de materiales que se diseñaron pa Xixón.

El puntu de vista del diseñu innovador de la campaña foi ún de los que más destacó la presidenta de la Unión de Comerciantes de Xixón Ana Menéndez, que declaró que la campaña tien "un diseñu atractivu que nun ye cursi nin paleto" al empar que reconoció qu dende la Unión de Comerciantes de Xixón l'usu del asturianu vese como "un valor añadíu al comerciu y non como un elementu disuasoriu" una llectura na que concueyaron la presidenta de los comerciantes y el director de Poítica Llingüística, qu'emponderó la campaña como un pasu más nel afitamientu de les oficines de normalización nos conceyos. Pela so parte, el conceyal de Promoción Económica José María Pérez emponderó la campaña como un elementu que-yos va dar más entidá a usos llingüísticos reales nes tiendes de la ciudá y adelantó la posible realización d'una futura campaña asemeyada empobinada al ámbitu de la hostelería.