Xixón, cruciada del blues y el rock mundiales

La organización del Festival de rock y blues Crossroad presentó ayeri en Teatru Xovellanos de Xixón col conceyal de festeyos Iván Álvarez el cartel definitivu de la segunda edición d'esti certame, que va repetir escenariu na plaza de toros de Xixón pero qu'adelanta feches respective a la edición del 2.003, que se fizo n'agostu, hasta'l 23 y 24 de xunetu.

Colos Stray Cats de Brian Setzer como ganchu de mayor interés pal públicu, el Crossroad 2.004 presenta un cartel que Kike "Louie" alma del festival y activu promotor musical, definió como más "compactu" que'l del 2.003 pero con un saltu cualitativu mui grande, tanto pol nivel de los grupos y artistes que van venir como porque se punxo un precuru especial n'enanchar el campu d'estilos musicales presentes. Asina, xunta los Stray Cats van tar tamién xente del prestixu del bluesman de Chicago Buddy Guy, el mayestru del Swing Ray Gelato o los veteranos del rock Nervous Eaters.

L'estáu americanu de Tenessee aporta bien de grupos al cartel, rescamplando ente ellos la formación de rock sureñu "Kings of Leon" bautizaos pola crítica como "los Strokes del sur" el grupu de rockabilly de Memphis "The Dempseys", y los heterodoxos Hayssed Dixie, un grupu que fai versiones bluegrass de grupos como AC/DC, Kiss, Queen o Aerosmith.

Laika & The Cosmonauts, representantes del surf y el punk de cochera, el tríu de rock "The Hi-Risers" el grupu de música de baile The Come Ons y el grupu catalán de Rock and Roll The Meows completen el cartel d'esta edición 2.004 del Crossroad na que'l grupu Mierense de blues Trashtornados va poner la presencia asturiana.

Los organizadores del festival sorrayaron el calter independiente del acontecimientu, que s'autofinancia ensin más sofitu institucional que l'empréstamu de la plaza de toros, y manifestaron el deséu de meyorar les cifres de públicu de la otra edición. Nesti sentíu, Kike "Louie" recordó que va haber ufiertes mercando la entrada por anticipao coles que van poder descontase hasta 12 euros nel abonu pal festival.
Más información na web del festival