Xixón acueye esti domingu l'Estatal de triatlón por clubes

Esta fin de selmana va celebrase en Xixón el campeonatu estatal de triatlón por clubes. El domingu va tener llugar la competición en primera y segunda división, mentes que la xornada del sábadu va destinase a un triatlón popular y a un Triatlón de la Muyer.

La sablera de Pando, n'El Natahoyo, va ser l'epicentru de la competición, na que ta prevista la participación de 1.350 triatletes de 104 clubes. La prueba absoluta va consistir nun primer tramu de natación de 750 metros per agües del Cantábricu, pa siguir con 20,1 quilómetros de bicicleta per un circuitu en direición a La Calzada y terminar con un percorríu a pie de 5 quilómetros otra vegada en Pando, onde va asitiase tamién la meta.

La prueba en primera división va dar salida a les 12 hores, en categoría femenina, y a les 13.30 hores, masculina. Enantes van celebrase les pruebes de segunda, a les 9 y a les 10 hores, de manera respeutiva. Mentes, mañana a les 11 hores va celebrase el Triatlón de la Muyer y a les 17 hores el Triatlón Popular de Xixón, con delles alternatives de circuitu según les posibilidaes de caún.