Xixón yá dispón de trés puntos de recarga pa vehículos llétricos

|

Xixón convirtióse’l martes na primer ciudá asturiana en tener puntos de recarga pa coches, motos y bicis llétricos. Les trés estaciones tán asitiaes xunto a la Plaza Mayor, El Molinón y la cai Canga Argüelles.
 
L’usu d’estos puntos de recarga de bateríes va ser de baldre’l primer añu, anque, pa poder utilizalos, los propietarios de vehículos llétricos han de dase d’alta na páxina web d’HC Energía pa recibir una tarxeta con un chip que permite acceder al enchufe asitiáu nel poste de recarga. Con esta iniciativa s’espera qu’aumente l’usu na ciudá de coches llétricos, que tienen como hándicap principial el so altu preciu. Nel Estáu español hai matriculaos poco más de 200 turismos que funcionen con lletricidá, una cifra menor a la esperada por fabricantes y alministraciones.
 
“Xixón ha de tar na vanguardia de les ciudaes llimpies” destacó l’alcadesa, Carmen Moriyón, na inauguración del puntu de recarga asitiáu xunto a la Plaza Mayor, na cai Ventura Álvarez Sala, un pasu que calificó de “curtiu, pero mui significativu”. Pela so parte, el direutor xeneral Corporativu y Comercial de HC Energía, Javier Sáenz de Jubera, anunció que la so empresa ta celebrando conversaciones con otros ayuntamientos del país pa la instalación de puntos de recarga comos los qu’estrenó ayeri Xixón.

Contador Estadistiques