Xixón va disponer d’un serviciu wifi d’accesu a Internet de baldre en 110 puntos de la ciudá dende esti martes

Toles persones que cuenten con un dispositivu d’accesu a Internet van poder disfrutar d’Internet de baldre en dellos puntos de Xixón dende esti martes. Los internautes van navegar a una velocidá de 512 Kb.
 
En total, van instalase 85 puntos d’accesu n’equipamientos municipales y 25 n’espacios públicos nos que los xixoneses van poder entrar n’Internet colos datos de la so tarxeta ciudadana. Amás, el Conceyu de Xixón ofrez la posibilidá d’acceder a una velocidá d’hasta 3 Mbps por 8 euros al mes. Los visitantes o les persones que nun cuenten con tarxeta ciudadana tamién van poder acceder al serviciu básicu mediante la introducción de dellos datos.
 
Gowex ye la empresa que xestiona esti serviciu que presentó güei’l conceyal de Facienda y candidatu del PSOE a l’alcaldía de Xixón, Santiago Martínez Argüelles.