Xixón, Uviéu y Avilés van illuminar edificios simbólicos pa reclamar l'abolición de la pena de muerte

El Teatru Xovellanos, el Campoamor y la Casa Conceyu de Avilés van ser illuminaos el vienres dientro de la campaña ‘Ciudaes pola vida’ contra la pena de muerte. Más de 1.500 poblaciones participen nesta iniciativa de carauter global.

La Comunidá de Sant'Egidio, cola collaboración de la Coalición Mundial contra la Pena de Muerte, de la que forma parte Amnistía Internacional (AI), entama per décimu añu consecutivu esta campaña de repercusión internacional que principió con 82 poblaciones participantes y qu’agora suma más de 1.500. N’Asturies, les trés ciudaes con mayor población sumáronse a la iniciativa que coincide col aniversariu de la primer abolición de la pena de muerte nel mundu, nel Granducato di Toscana nel añu 1786. Asina, el Xovellanos, el Campoamor y la Casa Conceyu d’Avilés van permanecer illuminaos mañana pa reclamar el desaniciu de la pena de muerte, al igual que la catedral de Bukayu, el Coliséu de Roma, l’Atomium de Bruxeles o la Campana de la Paz de Quito, ente otros.

Según datos apurríos por AI, al menos 676 persones foron executaes nel 2011, la mayor parte n’Estaos como China, Arabia Saudita, Corea del Norte, Estaos Xuníos, Iraq, Irán, Somalia y Yemen. Pese a nun haber datos oficiales, esta organización afirma que China acabó cola vida de más persones que’l restu de los países del mundu. N’Europa, l’únicu estáu que práuticó la pena de muerte foi Bielorrusia, mentes que Letonia convirtióse’l 1 de xineru nel nonaxésimosétimu país del mundu n’abolila dafechu. Miembros d’AI van tar presentes na illuminación del Teatru Campoamor, a les 19 hores, xunto con autoridaes municipales y activistes.