Xixón inaugura ‘les lletrones’, conxuntu escultóricu que nun recueye’l topónimu oficial

El conxuntu escultóricu que’l Conceyu de Xixón quier convertir nuna semeya obligada pa los turistes que s’averen a la ciudá foi inauguráu'l xueves. El coleutivu N’Ast esixe qu’esta escultura recueya’l topónimu oficial ‘Gijón/Xixón’.
 
La Xardinos de la Reina ye’l sitiu escoyíu pol Conceyu de Xixón pa instalar esti conxuntu escultóricu cedíu pola Federación d’Empresarios del Metal y Afines d’Asturies (FEMETAL) que representa’l logotipu turísticu de la ciudá y que busca convertise nun reclamu turísticu. La escultura ta formada por cinco lletres grandes d’aceru macizu –con una altura máxima de 3,5 metros– pintaes en collorao que conformen el topónimu castellanu ‘Gijón’. Tres elles, queda una vista d’El Muelle, la plaza’l Marqués y el Palaciu Revillaxixéu.
 
L’ausencia del topónimu tradicional ‘Xixón’ nesti conxuntu escoltóricu yá ta creando debate na ciudá. El coleutivu N’Ast considera que “nun ye de recibu qu’incluya namái el términu españolizáu despreciando al términu asturianu, ainda más cuando, al paecer, esti conxuntu escultóricu va ser el fondu de la mayoría de les imaxes que los turistes lleven del so pasu per Xixón”. Maruxa Marqués García, vocera de N’Ast, esixe “respetu a la llingua asturiana” y que se complete la escultura col términu ‘Xixón’, “como correspuende de manera llegal”.