Xixón edita un mapa de la parroquia de Caldones

El volume inxértase na colección de mapes de parroquies del conceyu, que yá tien asoleyaos los volúmenes de Somió, Cabueñes, Deva, Xove, Santurio y Castiello. Llavandera, Fano y Valdornón van ser les siguientes novedaes nesta colección. No tocante al mapa de Caldones, contóse cola asesoría de la presidenta de l'asociación de vecinos de Caldones María Jesús Bárcena y del profesor de la escuela "Jacinto Benavente" Xosé María García "Llábana" p'atropar los más de 350 topónimos ente llugares, ríos, montes y praos y los 107 caminos y caleyes que tan presentes nesti mapa que s'edita baxo'l nome xenéricu de "caleyando per Caldones". El profesor Xosé María García, que llamentó que pa delles formes toponímiques nun se siguieron nel mapa los sos encamientos, ye tamién l'autor de los testos n'asturianu qu'acompañen al mapa y que falen de los anicios históricos del llugar, les fiestes y tradiciones, hostelería, paisaxe, actividaes económiques y formes de vida tradicionales de la parroquia. La edición tien tamién testos en castellanu obra de Javier Granda y semeyes de Benedicto Santos.